يسعدنا نحن اعضاء وادارة كلا من ( مجموعة بكسل ) و ( اثراء المصممين )
ان يكون معنا الاستاذ عاطف بن حكران في لقاء تعارفي يجيب فيه عن الاسئلة المطروحة من الاعضاء في القروبين والزملاء شاكرين له تعاونه وحرصه على تقديم الفائدة للاخرين .. والان نترككم مع اللقاء
بدايةً نريد أن نعرف من هو الأستاذ عاطف بن حكران؟
عاطف بن حسن آل حكران الغامدي مواليد اكتوبر 1981 أب لسلطان من سكان مدينة جدة نشأت وترعرعت في مدينة الخرج مهتم بالتسويق وسيكولوجية المستهلك وبريادة الاعمال والمشاريع الصغيرة وأملك وأدير عدد من النشاطات التجارية مصمم وخطاط ورسام على قدي مو ذاك الزود يعني وعضو مؤسس في اثراء المصممين وحاصل على جائزة إصرار الثانية
هل التدريب في مطبعة على الآلات وطرق الطباعة والخامات ممكن يعود عالمصمم بفائدة كبيرة؟ وما أهم ما يجب على المصمم معرفته بخصوص الطباعة؟
جدا جدا .. منها راح تكون تصاميمه اكثر نجااح لمعرفته بالخامات والمخرجات وشكل الاعمال بعد التنفيذ / لعل اهم ما يجب معرفته من عالم الطباعة هو احجام ومقاسات المخرجات والخامات المتوفرة في السوق وطريقة فرز الالوان
من نظرتك كمصمم ولك بالمجال فتره طويله ، اذا انا ادرس التصميم كتخصص ، واعتبره مصدر رزق ! هل تشوف هذا شي صحيح ؟ اعتمادي الكامل يكون عليه ؟ ولا لازم يكون لي عمل اضافي بالمستقبل ؟
أي تخصص اذا تم التركيز عليه فهو مصدر رزق كبير لراعيه شرط انه فعلا يتخصص فيها
نظرتك للحياة بكلمة واحدة ؟
سلطان
من هم ملهمينك في التصميم الجرافيكي؟
سابقا : المصمم هاشم وخلاد وحاليا الأستاذ كميل حوا و الأستاذ علي البياهي و سلطان الجريس ونفحات الحربي ومهند باعارمة وعالميا
Stephen Wiltshire و cj_hendry
هل انت مؤسس اثراء المصممين ؟
لا المؤسس صديقي محمد الغانمي
متى بدايتك بالتصميم ؟
كالعادة من أيام المنتديات ( وقبلها حصة الفنية من الابتدائي )
كيف كانت بدايتك ؟
تفشل !
عاطف بن حكران ماهي اهدافه خلال ال 5 سنوات القادمه بإذن الله ؟
اكمل مشوار احلامي اللي ما تنتهي بمجرد تحقيقها
نصحية ودك توصلها للناس ؟
من يملك المعلومة يملك المستقبل
متى بدأت التصميم !
تمت الاجابه فوق
في اي مجال التصميم متخصص !
انا مو محترف فأي تصميم اعتبره تخصصي لين ينجح
هل تنصح بشركة دعايه واعلان !
كوظيفة ؟ ما اقدر احكم كمنفذ اعمال في شركات عملاقة زي القافلة وسعودي ساينز وسما والغصاب
وكيف جمعت تيم بن حكران ؟
خليها على الله من جد مو بالساهل
وهل هم مصممين اجانب ؟
نعم مع تعاوني من أسماء سعودية لامعة عن بعد وفي مشاريع عملاقة
هل سنشاهد تعاون بين اثراء وبكسل قريب ؟
التعاون قائم ومفتوح وبالعكس اثراء ببيكسل اقوى وبيكسل باثراء اجمل
تنوع اعمالك : كيف يتم التنسيق بينها ؟
تساهيل الله كثير خصوصاً إني من النوع اللي ما يتحرك الا في الأوقات الحرجة والشي ذا مسبب لي بعض المتاعب
أغلب المصممين يعانون من التسعير .. كيف تغلبت على ذلك ؟
باحتكاكي بالسوق ومعرفة تجارب وأسعار الاخرين ومعرفة تكاليف العمل بكل دقة ومعرفة خراجي من الشغلة اللي بين ايادي
التجارة وادارة العائلة كيف يتم التنسيق ؟
الناجح تجارياً فاشل اجتماعياً والاسرة هم ضحية التجارة الأولى ولكن نجتهد لنسدد ونقارب وتفهم ام سلطان وبقية عائلتي لوضعي ساعدني كثير
ماهي اهم ما يميز المشروع الناجح ؟ بعد توفيق الله
الشغف والشغف ثم الشغف
من يقوم بالتصميم بالوكالة ؟
أنا ومجموعة من الموظفين
السوق خلال خمس سنوات قادمة هل هو مناسب للمصممين مع وحود مواقع ومصادر جاهزه ؟
السوق فعلاً للمصممين من الآن .. بس مين اللي يصمل ؟
ماهو أكبر عائق للتاجر ؟
الإهمال وقلة رأس المال إذا وافقت ضعف همة وكسل وفقر معرفي
من نصحك ودعمك في التجارة ؟
الفقر
هل الدورات التي تقام حالياً للتحارة تنفع ام خوض السوق هو اللي يصقل التاجر ؟
هي تجارة من يقدمها فقط .. التجارة ممارسة وليست قراطيس وكتب نظرية
هل هناك تجارب تقنية مفيدة بالتجارة ؟
الخسارة هي المعلم الاكبر
موقف غير حياتك ؟
إنهيار تجارتي
قروب بكسل ماذا يعني لك ؟
الإصرار في التحصيل المعرفة والنشاط المنظم .. هو حديقتي التصميمية صحيح ان الحديقة ذي عليها حارس صعب ولكن له رونقه
كيف أعرف أن شغلي ممتاز ؟وكيف أعرف كمان أن شغلي وصل للاحترافية ؟
تعرف إنه ممتاز إذا انقبل من اللي بيدفع أما الإحترافية كمفهوم فصدقني كل ما قربت منها راح تتاكد إنك بعيد ولسى باقي لك مشوار لها .. اما بمفهوم تعريفي فكل ماقدرت تامن حياتك ومتطلباتها من ورى التصميم فبتصير محترف
مجال الطباعة كل يوم يتطور سواء مهارياً أو تقنياً ،، كيف ترى مستقبله ؟
فعلياً إحنا في السعودية متأخرين كثير عن حتى بعض الدول المجاورة في عالم تقنيات الطباعة وعليه المستقبل مشرق جداً
ماهي أول نقطة تحول عاطف بن حكران ؟
انتقالي لجدة والبداية من تحت الصفر
كيف بدأت قصتك مع التصميم؟ وكيف اكتشفت ذلك؟
مع بداية قصة حب .. تعلمت التصميم عشان اصير أوكيه وكذا
كم أقل راس مال لفتح وكالة دعاية وإعلان
بديت ب 800 ريال جمعتها لي عرابتي المرأة الحديدية أم زوجتي رضي الله عنها وأرضاها
ماهي البرامج التي تجيد استخدامها من برامج التصميم ..؟
الفوتوشوب والاليستريتور والكلك
لخص لنا أهم الجوانب اللي يركز عليها المصمم في المطبوعات بحكم خبرتك
الخامات والمقاسات
مصمم محبوب ماشاء الله تبارك الله
سؤالي: كيف استطاع أ.عاطف كسب العملاء ومانصيحته للمصمم المماطل بالمواعيد
كسبت العملاء باني دايما أحاول أكون جزء من نجاحه وبذل النصيحة له ولو كانت على حساب مكسبي
أما المماطلة اذا جات سيرتها فانا اسوي نفسي ميت … مماطل من النوع الفاخر نسال الله التعديل
وين تشوف نفسك بعد 10 سنين ؟ وكيف كنت قبل 10 سنين ؟ واين انت الان ؟
قبل 10 سنوات كنت اقل بكثير من عادي واللي يعرفوني عن قرب يعرفوا يش اقصد بعادي اما ما بعد 10 سنوات بإذن الله راح يكون اسم بن حكران منافس للشركات العربية الكبرى
عاطف .. كيف جيت لاثراء المصممين وكيف كانت بدايتك معهم ؟ عطينا القصة
في 2015 نقريبا شفت تغريدة لحبيبنا عبدالعزيز الحربي يبحث عن أعضاء لقروب الواتس ونقزت له والحمد لله الان انا عضو في الإدارة
ايش اكثر شي يخليك تستمر في مجال الدعاية والاعلان وايش اكثر شي يطفشك فيه ؟
اكثر شي يخليني استمر لقمة العيش واكثر شي يطفشني مطاردة العمالة ومراقبة الجودة والعميل المتردد
أبو سلطان ما شاء الله تبارك الله عندك إبداع في صياغة الكلام فهل جربت في صناعة محتوى وكذلك تملك ما شاء الله خامة صوتية فهل لك تجربة في هذا المجال ؟
صناعة المحتوى اشتغلت فيها كثير وخصوصاً أيام الدراسة الجامعية . .اما الصوت فالصدق اللي حولي كلهم يحطموني ويقولو صوتك مو حلو رغم اني مؤمن بجماله وحبليته ولكن الناس شهداء ف عليه العوض ومنه العوض
هل يوجد تحيز للعنصر النسائي في إثراء المصممين ؟
نعم . ولكنه عفوي غريزي غير ممنهج ولا متعمد واثراء كقروب شأنه شأن أي تجمع للعامة فيه التحيزات للجنس الآخر بشكل عادي وطبيعي ( لايعني رضاي وموافقتي ولكن الشمس ما تتغطى بغربال )
أين سيكون إثراء المصممين بعد 5 سنوات
ما قالو لي انهم بينقلون .. بس اذا صار جديد راح نبلغكم
لماذا لايتم توزيع المهام للاعضاء وتفعيل اللقاءات الشهرية للمجموعة
نتمنى والله وجربنا كثير بس مانلاقي تفاعل
مامفتاح فتح وكالة دعاية وإعلان ؟
التجربة
اعظم ملاحظة تقدمها لنا كمصممين ؟
التقليد والصبر والممارسة وتجديد العلم وعدم الاغترار بما وصلت اليه ولا تسمح للناس أن ينفخوك
كلنا يعلم ان صناعة فنجان القهوة فن .. و ذوق .. و سر و كذلك هو الرسم .. فمن لا ذائقة لديه .. فليس بفنان أبدا . سؤالي : من الذي أعطاك سر ( الفن ) في الحياة … و من هو معلمك في ذلك .
حبي للحياة
هل نستطيع ان نقول مسيرة عاطف كانت من الصفر ، وكيف كانت بالمختصر ؟
من تحت الصفر والله ,, ومسيرة صعبة والله
الكيفية الصحيحة للبدء بتعلم برامج ادوبي مثل اليستريتور والافترافكت؟
بتعلم مفرد وأدوات البرامج والتمكن منها
ما الذي يميزك عن غيرك في عالم التصميم ؟
ولااااااااااااااااااا شي
كيف تعززت ثقتك بنفسك .. يعني متى حسيت انك مصمم تقدر تقول عليه محترف وترضا بأعمالك؟
بكلمات الرضا من عملائي
لو عرض عليك دور لتقديم صوت شخصية كرتونية توافق؟
هو انا أطول يا باشا ؟؟ ياليييييييييييييت على يدك تكفى
ما هي أنواع لافتات المحلات؟ أو أسماءها
كثير .. أهمها لوحات الفليكس فيس والحروف البارزة … يووووه سؤالك بحر
كيف ترفع ثقتك بنفسك وشغلك؟
انا متحلطم بالعادة واشعر بالتقصير فغالبا قدرتي لرفع معنوياتي ضعيفة جداً
تجربة الخسارة والربح في مجال الدعاية والاعلان وتوقف السيولة والبحث عن لقمة العيش وتسريح العمال .. ايش قصتك معاهم وكيف خرجت من هذي الازمة ..
والله باقي ما خرجت بس الحمد لله مو اول مرة .. وعودني ربي على التعويض وجبر خاطري
ماذا تعني لك أصوات الطابعات ورائحة الحير ؟
يووووووه ما أبرد ذلك الصوت على كبدي
هل تعتقد وجود ويب سايت للمصمم يعرض أعماله ويستقبل تصاميم من خلاله له اهميه .. ولا تغنيه عن ذلك باقي مواقع السوشل ميديا ( تويتر انستقرام …)؟!
السوشال ميديا المفعلة النشيطة افضل بكثير وان كان الويب سايت يعتبر مرجع رسمي للشخص
كيف تدير وقتك من إدارة الوكالة والمشاركة في القروبات كونك إداري في بعض منها؟
الصدق اني أهرب من مهامي الوظيفية باشراف القروبات ( يعنني مشغول وانا الصدق شارد من الشغل / مفرنك )
ماذا تنصح المصممين
فتح مشروع استديو تصميم..
الاستوديو افضل او العمل كمصمم فريلانسر؟
طبيعة العمل في الوكالات تتطلب السرعة والانجاز.. لكن على حساب الابداع..
ما الحل في رايك؟ وهل ترضى بعمل إنت تراه ناقص أو يتطلب عمل إضافي لكي يكتمل مع ان العميل مقتنع به ومستعجل منه؟
الفلوس هي الحكم .. طالما في قرنقش الأمور في السمبتيك ( لاذمة ولا ضمير ولا مبادئ ههههههههه )
ماهو حلم طفولتك ؟وهل تحقق ؟
يكون عندي وكالة دعاية وإعلان ( اللي حاصل معي الان مو نفس المشهد اللي في بالي وانا صغير ) وعليه : لسى ما تحقق الحلم
ايش مواصفات المصمم اللي تختاره يشتغل معاك ؟ و هل تركز على شهاداته بمجال التصميم أو على شغله حتى لو ما كان عنده شهادات ؟
أبدا لا أنظر للشهادات فقط أنظر لأمرين مهمين ( ذوقه هل يناسب مخرجات وكالة بن حكران ) وخبرته في التعامل مع المطابع .. بس
ماذا يقدم عاطف بن حكران في إثراء المصممين ؟
بعيدا عن بعض الأمور اللوجستية المخفية عن أنظار العامة انا احب اقدم النصح دائما للمشاركين
هل تميل الى العنصرية بين مصممين بكسل واثراء؟
لا والله .. كلهم حبايب ولا شي شخصي البته
كيف تعرفت على قروبات التصميم ومتى كانت اول اضافة لك في احد القروبات ؟
اثراء كانت البداية
كيف كانت بدايتك بالتصميم ؟؟
زي ما قلت فوق .. تفشل
ليش انت صريح بزياده ف مجال التصميم ؟ وتتوقع ان الصراحه هذي هي اللي مخليّه حضورك قوي ؟
لما أحد يطلب نصيحتي ورأيي اشوف اني مؤتمن في إجابتي وضروري أقول الصدق لإيماني الشديد بان التسليك يضر ما ينفع
البنات في مجال التصميم البعض وليس الكل ، تعاني من انها تدخل عاطفتها شوي بشغلها ، يعني اذا جاها انتقاد تاخذه بشكل شخصي أكثر ! كيف ممكن تتغلب ع هالمشكله برأيك ؟
طبيعي هذا الشي لطبيعة المرأة .. ولكن بالممارسة والاحتكاك والمواقف راح تتجسن كثير واعرف بنات كثير تجاوزوا المرحلة بكل نجاح
مع التطورات هذي اللي قاعده تصير وغلاء المعيشه ، تتوقع تأثر ع التصميم بشكل كبير ؟ يعني تنزل أسعاره او لا ؟
طبيعي المصمم يقدم سلعة زيه زي أي تاجر آخر فمن الطبيعي يتأثر منتجه بالسوق
أصعب العقبات التي واجهتك لتحقيق حلمك ؟
ماكنت الاقي اللي يوجهني وكنت أضيع كثير وخسرت كثير في إني أمسك الطريق الصح ومازلت أعاني
ايش تتمنى تكون بعد ١٠ سنوات
يا أخوان وش معكم بعد عشر سنين ؟ كلكم تسألون عن بعد 10 سنوات .. في احد مستنيني هناك ؟
ماهي إستراتيجيات وخطوات عمل الشعارات ؟
صعب اشرح شي تم تأليف كتب فيه
نصيحة توجهها للمصممين؟
الصدق مع الذات في ما اذا فعلا تبغى تسير مصمم والا بس تتسلى ثم الحرص على المعرفة والتعلم النشط
ختاماً نشكرك أستاذ عاطف بن حكران هل لديك كلمة اخيرة؟
أشكر بكسل عامة وأخص الأستاذ ثامر الصعيدي وكل من رشحني لأكون انا التالي في المقابلة الجميلة هذي وأتمنى المزيد والمزيد من الازدهار لبيكسل مثل ما اتمناه لإثراء
629 total views, 1 views today